Кыргызстан Кытайдан келе турган туристтер үчүн визасыз режим киргизди

Кыргызстан Кытайдан келе турган туристтик топтор үчүн визасыз режим киргизди. Бул тууралуу бүгүн, 28-октябрда министрлер кабинетинин төрагасынын орун басары Эдил Байсалов билдирди.

Ал Кытайдын Элдик саясий консультациялык кеңешинин Бүткүл кытайлык комитетинин төрагасынын орун басары, Бүткүл кытайлык аялдар федерациясынын төрайымы Шэнь Юэюэ менен болгон жолугушууда айткан.

Байсалов Кытайдан келе турган туристтик топтор үчүн 21 күнгө чейинки мөөнөткө визасыз режим киргизилгендигин билдирди. Бул чара элдик дипломатия тармагындагы кызматташтыкты өркүндөтөт жана Кыргызстандын бүгүнкү күндө эң популярдуу туристтик рыногу үчүн жагымдуулугун жогорулатат.

Ошондой эле жолугушууда алар эки тараптуу кызматташуунун актуалдуу маселелерин, анын ичинде соода-экономикалык жана маданий-гуманитардык өз ара аракеттенүүнү жана эл аралык уюмдардын алкагында кызматташууну талкуулашты.