Бишкекте Хонда Фит унаасы кичинекей кызды тебелеп кеткен окуя боюнча милиция үн катты

Бишкекте Хонда Фит унаасы кичинекей кызды сүзүп, тебелеп кеткен окуя боюнча тергөөгө чейинки текшерүү иштери башталды. Бул тууралуу бүгүн, 29-октябрда шаардык милициядан кабарлады.

Маалыматка ылайык, кырсык 27-октябрда саат 21:30дар чамасында калаадагы 7-апрель жана Ахунбаев көчөлөрүнүн кесилишинде жайгашкан гипермаркеттердин биринин унаа токтотуучу жайынын чыга беришинде орун алган.

2000-жылы туулган Н.Р. аттуу Хонда Фит үлгүсүндөгү унаанын айдоочусу жөө жүргүнчүлөрдү өткөргөн соң, кичинекей баланы байкабай калып, сүзүп алган.

Учурда унаа убактылуу айып короого токтотулуп, айдоочусу наркологиядан текшерилип, соттук-медициналык экспертиза дайындалды.

Баланын ата-энеси ооруканага кайрылган.

Буга чейин социалдык тармактарда Көк-Жар кичи районунда Honda Fit унаасы кичинекей кызды сүзүп, тебелеп кеткен видео тараган.