Чеченстанда Путин атындагы университетке учкучсуз учактар ​​чабуул коюшту

Чеченстанга учкучсуз учактар ​​тарабынан чабуул жасалган. Бул тууралуу бүгүн, 29-октябрда Чеченстандын башчысы Рамзан Кадыров өзүнүн Telegram каналына билдирди.

Гудермес шаарындагы кол салуудан улам өлкөнүн президенти Владимир Путиндин ысымын алып жүргөн Орусиянын атайын күчтөрү университетинин аймагындагы бош имараттын чатыры күйүп кетти.

Кадыровдун айтымында, кол салуу таңкы саат 6:30да болгон, жабыркагандар жана каза болгондор жок.

"Тергөө органдары окуянын чоо-жайын иликтеп, кылмышка катыштыгы бар адамдарды аныктоого киришти. РУСтун ишмердүүлүгү токтотулган жок, бардык кызматтар кадимки режимде иштеп жатат", - деп айтылат маалыматта.

Орусиянын Коргоо министрлигинин маалыматы боюнча, Орусиянын абадан коргонуу күчтөрү бир түндө Украинанын 7 учкучсуз учагын атып түшүрдү.