Министр Бакетаев коррупциядан казынага канча каражат өндүрүлгөнүн айтты

Финансы министри Алмаз Бакетаев жемкорлуктан өндүрүлгөн сумманын көлөмү 46 миллиард сом экенин айтты. Ал бул тууралуу бүгүн, 29-октябрдагы Жогорку Кеңештин Бюджет, экономикалык жана фискалдык саясат боюнча комитетинин жыйынында билдирди.

Анда ал депутат Эльвира Сурабалдиеванын суроосуна жооп берип жатып, айтылган суммадан тышкары дагы бир катар мүлктөр да мамлекетке алынганын кошумчалады. Ал эми Мамлекеттик мүлктү башкаруу боюнча мамлекеттик агенттиктин директорунун биринчи орун басары Кубанычбек Жаниев мамлекетке алынган мүлктөрдүн так саны боюнча маалыматы жок экенин айтты.

Эске салсак, 12-июлда Улуттук коопсуздук мамлекеттик комитети 6 ай ичинде казынадан 70 миллиард сомдон ашык каражат уурдалганы аныкталганын, анын 50 миллиард сому өндүрүлгөнүн маалымдаган.