"Оор абалда". Тергөө абагындагы Имамидин Ташовдун өзүнө кол салганы айтылууда

"KG Group" курулуш компаниясынын негиздөөчүсү Имамидин Ташов тергөө абагында өзүнө кол салган деген жүйө менен ооруканага жеткирилгени кабарланууда. Бул тууралуу бүгүн, 30-октябрда анын жактоочусу Самат Матцаковго таянып "Азаттык" сайты жазып чыкты.

Андагы маалыматка караганда, УКМКнын тергөө абагында кармалып турган ишкерди "Тез жардам" унаасы ооруканага алып кеткен.

"Мен бүгүн Ташовго жолугуу үчүн УКМКнын тергөө абагына келгем. Ал жердеги нөөмөтчү киргизбей "күтүп тур" деп койду. Ошол жерден Имамидин Ташов өзүнө кол салып, "Тез жардам" менен ооруканага алып кеткенин угуп калдым. Мен 103 аркылуу "Тез жардам" кызматына чалып, сурасам, мага УКМКнын тергөө абагына 40-45 жаштардагы эркек адам өзүнө кол салганы тууралуу чакыруу болгонун, "Тез жардам" аны шаардагы №4 ооруканага алып кеткенин ырасташты. Бирок ал өзүнө кантип кол салганы тууралуу маалымат беришкен жок. Мен да азыр эле ооруканага келдим", - деген адвокат.

Айрым ЖМКлар анын оор абалда экенин жазышты.

УКМК бул тууралуу маалымат бере элек.