Парламент мамлекеттик мейманкаларда кумаркана ачууну дароо үч окууда колдоду 

Бүгүн, 30-октябрда Жогорку Кеңештин жыйынында “Кыргыз Республикасындагы оюн-зоок иши жөнүндө” мыйзамга өзгөртүү киргизүү тууралуу мыйзам долбоору каралып, дароо үч окууда кабыл алынды. Ага ылайык, мамлекеттик жана муниципалдык мейманканаларда кумаркана ачууга уруксат берилет. Эми ага президент кол койгондон кийин күчүнө кирет.

Мыйзамга ылайык, кумарканаларды рестораны бар мейманкаларда гана ачууга болот. Ресторанда кеминде 100 орун, ал эми мейманканада 20 номер болушу шарт. Мектеп, бала бакча, окуу жай, турак үйлөрдө кумаркана ачууга тыюу салынган.

Азыркы иштеп жаткан мыйзам боюнча, мамлекеттик жана муниципалдык же мамлекеттин үлүшү бар мейманканаларда кумаркана ачууга тыюу салынган. Мындан улам ал норманы алып салуу үчүн өкмөт иштеп чыккан мыйзам долбоорун экономика жана коммерция министринин орун басары Гүлшат Асылбаева тааныштырды.

Асылбаева депутаттардан долбоорго бир эле учурда үч окууда добуш берүүнү суранды. Жогорку Кеңештин Бюджет, экономикалык жана фискалдык саясат боюнча комитетинин төрагасынын орун басары Дастан Бекешев мыйзам долбоорун кароодо депутаттардан сунуш түшпөгөнүн, ошондой эле үч окууда добуш берүү боюнча фракциялардын корутундулары бар экенин билдирди.

Добуш берүүнүн жыйынтыгында мыйзам долбооруна каттоодон өткөн 79 депутаттын 59у "макул", үчөө "каршы" деп добуш берди.