Алымкадыр Бейшеналиев ДСУнун Башкы директору менен жолугушту

Саламаттык сактоо министри Алымкадыр Бейшеналиев Бүткүл дүйнөлүк саламаттык сактоо уюмунун (ДСУ) башкы директору Тедрос Адханом Гебрейесус менен жолугушуу өткөрдү.

Министрлик кабарлагандай, тараптардын жолугушуусу Европа региондук комитетинин 74-сессиясынын алкагында кечээ, 29-октябрда орун алган.

Анда тараптар Кыргызстандын калкынын ден соолугун жана өлкөнүн саламаттык сактоо системасын чыңдоого багытталган мындан аркы кызматташуунун келечегин талкуулашты.

Министр медициналык кызмат көрсөтүүлөрдүн натыйжалуулугун жогорулатууда мамлекеттик-жеке өнөктөштүктүн, ошондой эле санариптик саламаттык сактоо куралдарынын маанилүүлүгүн баса белгиледи.

ДСУнун Башкы директору Тедрос Адханом Гебрейесус Кыргызстандын калктын саламаттыгын жана бакубаттуулугун жакшыртууга багытталган улуттук жана аймактык демилгелерин ишке ашырууда ДСУ мындан ары да колдоо көрсөтүүгө даяр экенин белгиледи.