Нурланбек Шакиевге Казакстандын II даражадагы “Достук” ордени ыйгарылды

Бүгүн, 31-октябрда Казакстандын президенти Касым-Жомарт Токаевдин жарлыгы менен эки мамлекет ортосундагы байланыштарды бекемдөөгө жана өнүктүрүүгө кошкон зор салымы үчүн Жогорку Кеңештин төрагасы Нурланбек Шакиев II даражадагы “Достук” ордени менен сыйланды.

Сыйлыкты Казакстан парламентинин мажилисинин төрагасы Ерлан Кошанов Кыргызстандагы расмий сапарынын алкагында төрага Шакиевге салтанаттуу түрдө тапшырды. Ал ыйгарылган сыйлык үчүн ыраазычылыгын билдирди.

“Достук” ордени мага берилгени менен, мен жетектеген жалпы Жогорку Кеңеш үчүн чоң сыймык. Биз калыптанган кызматташтыкты арттырып, мындан ары да боордош элдин достугун чыңдоо багытында иш алып бара беребиз”, - деди Шакиев.

Ошондой эле төраганын орун басары Нурбек Сыдыгалиевге казак президентинин Ардак грамотасы берилди.