“Айына 80 тонна...” Кыргызстан Өзбекстанга картошка экспорттойт

Кыргызстандын картошкалары Өзбекстандын рыногуна чыгат. Бул туурасында бүгүн, 31-октябрда Айыл чарба министрлиги билдирди.

Маалымдалгандай, Өзбекстандын эң ири супермаркеттеринин бирине кыргыз картошкасын экспорттоо келишимине кол коюлду.

Кошумчалангандай, “Олма” соода түйүнүнө кыргыз картошкасын экспорттоону "Кыргыз Агрохолдинг" ачык акционердик коому жүзөгө ашырат.

“Макулдашуунун алкагында узак мөөнөттүү негизде жогорку сапаттагы кыргыз картошкасын айына 80 тоннага жакын жеткирүүлөр болот. Бул Өзбекстандын супермаркеттеринин текчелеринде азык-түлүктөрдүн туруктуу болушун камсыз кылат жана Кыргызстанда өндүрүлгөн экологиялык таза азыктарга өсүп жаткан суроо-талапты канааттандырат”, - деп айтылат маалыматта.