Азимбек Бекназаровдун абактагы мөөнөтү эки айга узартылды

Бишкектин Биринчи май райондук соту кечээ, 31-октябрда саясатчы Азимбек Бекназаровдун бөгөт чарасын карап, абактагы мөөнөтүн 2-январга чейин узартты. Бул тууралуу анын уулу Руслан Бекназаров билдирди.

Анын айтымында, тергөө бир дагы жолу атасын суракка албай, эмне байлыгы бар экенин издөө менен алек болууда.

Белгилей кетсек, 12-сентябрда УКМК Азимбек Бекназаров “2010-жылы Апрель окуяларында банк кутучаларынан жана өкмөт үйүнөн алынган акчаны уурдоо жана коротуу фактысы” боюнча кармалганын билдирген. Андан соң райондук соттун чечими менен камакка алынган. Саясатчы Бишкектеги №1 тергөө абагында кармалууда. Ал өзүнүн кармалышын саясий негизде деп эсептей турганын билдирген.

Кийин Бекназаров президентке кайрылып, 1 миллион долларды кымырып алган деген маалыматты мурда депутаттык комиссия жана прокуратура текшерип, мыйзам бузуу таппаганын айткан. Жакындары болсо өлкө башчыдан аны үй камагына чыгарууну өтүнгөн.