Азимбек Бекназаров абактан чыкты

Саясатчы Азимбек Бекназаров эч жакка чыкпоо тил каты менен абактан чыкты. Мындай чечимди Биринчи май райондук соту бүгүн, 4-ноябрда кабыл алган.

Судья УКМКнын тергөөчүсүнүн баш коргоо чарасын үй камагына алмаштыруу өтүнүчүн канааттандырган эмес.

Белгилей кетсек, 12-сентябрда УКМК Азимбек Бекназаров “2010-жылы Апрель окуяларында банк кутучаларынан жана өкмөт үйүнөн алынган акчаны уурдоо жана коротуу фактысы” боюнча кармалганын билдирген. Андан соң райондук соттун чечими менен камакка алынган. Саясатчы Бишкектеги №1 тергөө абагында кармалууда. Ал өзүнүн кармалышын саясий негизде деп эсептей турганын билдирген.

Кийин Бекназаров президентке кайрылып, 1 миллион долларды кымырып алган деген маалыматты мурда депутаттык комиссия жана прокуратура текшерип, мыйзам бузуу таппаганын айткан. Жакындары болсо өлкө башчыдан аны үй камагына чыгарууну өтүнгөн.