Казакстанда герб менен желек таштандыга ыргытылган. Полиция кылмыш ишин козгоду

Коңшу Казакстандын Талгар районунун Эркин айылында жергиликтүү тургундар таштанды таштоочу жайдан Казакстандын мамлекеттик символикасын табышты. Бул тууралуу казак басылмалары жазышты.

Жергиликтүү тургундар муну өлкөгө жана анын символикасына болгон сый-урматка шек келтирүү жол берилгис жана кемсинтүү аракети экенин айтып, арызданышкан.

"Жооптуу органдарга кайрылып, иликтөө жүргүзүп, күнөөлүүлөрдү таап, жазалоону жана мындай көрүнүш кайталанбасын камсыздоону суранабыз. Полиция менен акимчиликти тез арада чара көрүп, адилеттикти калыбына келтирүүгө чакырабыз", - дешкен жергиликтүү тургундар.

Бул боюнча Алматы облустук ички иштер башкармалыгы кылмыш ишин козгогон.

"Иликтөө иштери жүрүп жатат. Талгар райондук полиция кызматкерлери окуянын бардык жагдайларын аныктоо үчүн зарыл болгон ыкчам иш-чараларын баштады", - деп билдирген Алматы облустук полициясы.