Түндүк Корея дагы 7 ракетасын Японияны көздөй учурду

Түндүк Корея бир жумада экинчи жолу баллистикалык ракета учурду. Бул тууралуу Япониянын Коргоо министрлигине таянып чет элдик басылмалар жазышты.

Маалымдалгандай, ракета Япония деңизин көздөй учкан.

Япониянын Жээк коопсуздугун коргоо кызматы баллистикалык ракета жергиликтүү убакыт боюнча 07:55де конгонун билдирген.

Кийинчерээк өлкөнүн коргоо министри Ген Накатани Түндүк Корея 400 чакырым алыстыкка жана 100 чакырым бийиктиктей алчу 7 баллистикалык ракета учурганын, алардын бардыгы мамлекеттин өзгөчө экономикалык аймагынан тышкары жерлерге түшкөнүн билдирди.

Белгилей кетсек, 31-октябрга караган түнү Түндүк Корея өзүнүн эң жаңы континенттер аралык баллистикалык ракетасы "Хвасон-19ду" учурган. Түндүк Корея тараптын билдирүүсүнө караганда, Пхеньян ракетанын “сокку күчү боюнча абсолюттук артыкчылыгын” көрсөтүү үчүн “критикалык сыноо” өткөрдү. Андан кийин ракета Хоккайдодогу Окушири аралына, ошондой эле Япониянын өзгөчө экономикалык аймагынан тышкары жерге кулаган.

Ал арада Түндүк Кореянын баллистикалык ракета учуруусуна жооп иретинде АКШ менен Түштүк Кореянын аскерлери машыгуу өткөрүшөрү айтылган.