Садыр Жапаров Эрдоганды тосуп алууда тигилген боз үйлөр Түркияга берилгенин айтты

Мамлекет башчы Садыр Жапаров Түркия президентти Режеп Тайып Эрдогандын Кыргызстанга жасаган мамлекеттик сапарында аны тосуп алуу үчүн тигилген боз үйлөр бардык жасалгалары менен түрк тарапка берилгенин билдирди. Ал бул тууралуу бүгүн, 5-ноябрда "Ынтымак ордо" президенттик администрациясында эки өлкө лидерлеринин жолугушуусунда айтты.

Жапаров кыргыз улуттук үйү эки өлкөнүн көп жылдык боордоштук мамилелеринин урматы үчүн берилип жатканын белгиледи.

"Боз үй – кыргыз эли үчүн ыйык мааниге ээ. Анкени ал адам жакындары менен жашоосун өткөргөн үй. Берилген боз үйлөр түрк тилдүү элдердин биримдигин көрсөтүп, өлкөлөрдүн ортосундагы стратегиялык мамилелерди мындан ары өнүктүрүүгө жана бекемдөөгө умтулуунун символу балуп калат деп ишенем", - деди өлкө башчы

Белгилей кетсек, Түркиянын лидери Эрдоган 4-ноябрда мамлекеттик сапар менен Бишкекке келген. Аны "Манас" эл аралык аэропортунан тигилген боз үйлөрдүн, салтанаттуу концерттик программанын коштоосунда Садыр Жапаров тосуп алган болчу.