Садыр Жапаров менен Виктор Орбан тар курамда сүйлөштү. Анда эмне кеп болду?

Президент Садыр Жапаров жана Венгриянын премьер-министри Виктор Орбан бүгүн, 5-ноябрда чакан курамда сүйлөшүүлөрдү өткөрүштү. Бул тууралуу президенттин басма сөз кызматынан билдирди.

Анда Кыргызстан менен Венгриянын ортосундагы эки тараптуу күн тартибиндеги маселелердин кеңири спектри, ошондой эле ар кандай чөйрөлөрдө эки тараптуу кызматташтыкты өнүктүрүүнүн перспективалары талкууланды.

Жапаров Кыргызстан Түрк мамлекеттер уюмунун саммитин өткөрүү алдында турарын жана тарыхы, маданияты, түпкү тамыры бир түрк тилдүү мамлекеттери менен ар тараптуу мамилелерди бекемдөөгө өзгөчө маани берерин белгиледи. Жолугушууда мамлекет башчысы Кыргызстан Венгрия менен өз ара урматтоо жана ишенимге негизделген достук мамилелерин жогору бааларын баса белгилеп, стратегиялык өнөктөштүктү бекемдөө маселелерин талкуулоого даярдыгын билдирди.

Өз кезегинде Орбан жылуу меймандостугу үчүн ыраазычылык билдирип, Кыргызстан менен Венгриянын ортосунда көптөгөн негизги багыттар боюнча жемиштүү кызматташтык бар экенин айтты. Ал өлкөлөр ортосундагы мамилелер жогорку деңгээлде экенин белгилеп, соода-экономикалык кызматташтык, айыл чарба, билим берүү жана маданият сыяктуу тармактарда эки тараптуу байланыштарды мындан ары өнүктүрүү үчүн олуттуу потенциалды айта кетти.