Украинанын учкучсуз учагы Белгороддогу көп кабаттуу үйгө кол салды

Украина менен чек арага жакын жайгашкан Орусиянын Белгород шаарындагы көп кабаттуу турак жайды дрон сүзүп, анын кесепетинен бир нече киши жабыркады. Бул тууралуу облустун губернатору Вячеслав Гладков өзүнүн Telegram каналына жазды.

"Украинанын Куралдуу күчтөрүнүн учкучсуз учагы Белгороддогу көп кабаттуу үйгө кол салды. Кол салуунун кесепеттери тууралуу маалымат такталууда", - деп жазды ал.

Орусиянын Mash жана Baza телеграм каналдары кеп Новая жизнь районундагы Каштановая көчөсүндө жайгашкан үй жөнүндө болуп жатканын жазышууда.

Гладковдун айтымында, бир адам жарадар болуп, ооруканага жаткырылган. Baza үч жабырлануучу бар экенин, ал эми Mash телеграм каналы бешөө жарадар болгонун жазды.

Облус башчысы ошондой эле окуянын кесепетинен үч батир күйүп кеткенин айтып, окуя болгон жерде Тез жардам кызматы иштеп жатканын кошумчалады.