Токмокто жаранды арматура менен сабаган шектүү кармалды

Токмок шаарында адам уурдоого шектелип 23 жаштагы жаран кармалды. Бул тууралуу бүгүн, 6-ноябрда Чүй ОИИБинен билдирди.

Маалыматка ылайык, 30-сентябрда Токмок шаарынын ички иштер бөлүмүнө Т.М. атуу жаран арыз менен кайрылган. Ал шаар ичинен 2 адам аны арматура менен сабап, андан соң күч колдонуу менен Volkswagen Passat үлгүсүндөгү унаага салып Чүй районунун Ак-Бешим айылындагы талаага алып барышканын, ал жактандагы ур-токмокко алышканын айткан.

Бул факты боюнча Кылмыш-жаза кодексинин 165-беренесинин (Адам уурдоо) негизинде кылмыш иши козголуп, жабырлануучунун алган жаракатынын оордугун аныктоо үчүн соттук-медициналык экспертиза дайындалган.

Облустук милиция шектүү делгендердин бири, 23 жаштагы жаран кармалып, убактылуу кармоочу жайга киргизилгенин, экинчи шектүүгө карата издөө иштери жүрүп жатканын кошумчалады.

Учурда тергөө иштери уланууда.