Токмоктук тургун ири суммадагы акчасын 3 аялга алдатып жиберген. Шектүүлөр кармалды

Токмок шаарында алдамчылыкка шектелген 3 аял кармалды. Бул тууралуу бүгүн, 7-ноябрда Чүй облустук ички иштер башкармалыгы билдирди.

Маалыматка ылайык, 14-октябрда Токмок шаарынын ички иштер бөлүмүнө 77 жаштагы жаран арыз менен кайрылган. Ал 3 аял өздөрүн Кызыл Крест уюмунун өкүлдөрү катары тааныштырып, 80 миң сом жана 200 евросун алдап кеткенин айткан.

Бул факты боюнча Кылмыш-жаза кодексинин 209-беренесинин (Алдамчылык) негизинде кылмыш иши козголгон.

Шектүү катары мурда бир нече жолу соттолгон 43 жана 39, 34 жаштагы жарандар кармалып, шаардык соттун чечими менен 1 айга камакка алынган.

Учурда тергөө иштери уланууда.