Токмокто 37 жаштагы жаран сабалып каза болду

Токмок шаарынан адам өлтүрүүгө шектелген жаран кармалды. Бул тууралуу бүгүн, 12-ноябрда Чүй облустук ички иштер башкармалыгы билдирди.

Маалыматка ылайык, 9-ноябрь күнү саат 19:00 чамасында милицияга белгисиз адамдын жансыз денеси табылгандыгы тууралуу билдирүү түшкөн. Факты боюнча иликтөө иштери башталып, маркум 37 жаштагы шаар тургуну экени такталган. Ал эми дайындалган соттук-медициналык экспертиза анын денесинен жаракаттарды аныктаган.

Аталган фактынын негизинде Кылмыш-жаза кодексинин 122-беренеси (Адам өлтүрүү) менен кылмыш иши козголгон. Шектүү катары 34 жаштагы жаран кармалып, убактылуу кармоочу жайга киргизилген.

"Шектүү менен маркум спирт ичимдиктерин ичип отурушуп, ортодо пикир келишпестик жаралып, чырга айланган. Натыйжада 34 жаштагы жаран аны сабап өлтүргөн жана кылмыш болгон жерден качып кеткен", - деп айтылат маалыматта.

Учурда тергөө иштери уланууда.