Жаңы Зеландияда 40 миң маори өз укуктарына коркунуч келтирүүгө каршы акцияга чыгышты (видео)

Жаңы Зеландиянын парламентине жергиликтүү маори элинин 40 миңден ашык өкүлдөрү чогулушту. Бул тууралуу чет элдик басылмалар жазышууда.

Алар 1840-жылы британдык колонизаторлор менен маориликтердин ортосундагы келишимди кайра чечмелей турган мыйзам долбооруна каршы нааразылык билдирип жатышат.

Мыйзам долбоору каралып жаткан парламент үйүндөгү делегацияны маори ханышасы Нга Вай Хоно жана Те По башчылык кылышты.

Бул нааразылык жүрүш тарыхтагы эң ири акция болуп калды. Маорилер башкаруучу коалицияга кирген либертариандык акт саясий партиясы киргизген мыйзам долбооруна каршы нааразылык билдирип жатышат. Документ 1840-жылы британ колонизаторлору менен бир нече маори урууларынын жетекчилери кол коюшкан жана азыркы Жаңы Зеландиянын негиздөөчү документи болуп эсептелген Вейтанги келишиминин жаңы интерпретациясын камтыйт.