Ташиевге кол салууну пландаган УКТ мүчөсү "Руслан Бостери" кармалды (видео)

Маркум Камчы Көлбаевдин уюшкан кылмыштуу тобунун активдүү мүчөсү, кылмыш дүйнөсүндө "Рус коён" жана "Руслан Бостери" каймана аттары менен таанымал болгон Руслан Дүйшеев кармалды. Бул тууралуу бүгүн, 20-ноябрда Улуттук коопсуздук мамлекеттик комитети кабарлады.

Маалыматка ылайык, ал кылмыштуу жол менен алынган кирешелерди адалдоо фактысы боюнча козголгон кылмыш ишинин алкагында 16-ноябрь күнү Жалал-Абад облусунун Токтогул районунда жашырынып жүргөн жеринен колго түшкөн. Атайын кызмат колго тийген маалыматтарына таянып, Дүйшеев УКМК жетекчилигине кол салууну уюштуруу планын иштеп чыкканын маалымдады.

"Дүйшеев 1983-жылы Ысык-Көл районунун Бостери айылында туулган. Көлбаевдин жакын адамдарынын бири болуп Бостери айылын караган. Мурда каракчылык, адам өлтүрүү сыяктуу оор жана өзгөчө оор кылмыштар менен соттолгон", - деп айтылат маалыматта.

УКМК иликтөө иштеринин жыйынтыгы менен Дүйшеевге уюшкан кылмыштуу топту түзгөн жана ага катышкан деген айып тагылып, тергөө абагына киргизилгенин кошумчалады.