Кайсы өлкөлөр Нетаньяхуну камакка алууга даяр?

Нидерланды, Швейцария, Италия жана башка ондогон өлкөлөр Гаага сотунун чечимин аткарарын жарыялашты.

Нидерланды Биньямин Нетаньяху менен Йоав Галант өлкөгө кирсе, ордерлерди аткарарын билдирген.

Эл аралык соттун чечими Голландиянын Тышкы иштер министрлиги үчүн да күтүүсүз болду. Министрликтин башчысы Каспер Вилдкамп Израилге сапарын токтотууга аргасыз болду.

Нидерланды, Швейцария, Ирландия, Италия жана Испания өз милдеттерин Рим статутуна жана эл аралык мыйзамдарга ылайык аткара тургандыктарын билдиришти. Австрия да ушундай деп билдирди, бирок анын тышкы иштер министри Александр Шалленберг ордер "абсурд" экенин кошумчалаган. Ага карабай Вена премьер-министр Австрияга келсе, Нетаньяхуну кармап, Гаага сотуна өткөрүп берүүгө милдеттүү болот.

Эске салсак, 21-ноябрда Гаагадагы Эл аралык кылмыш соту Израилдин премьер-министри Биньямин Нетаньяху, мурдагы коргоо министри Йоав Галант жана башкаларды камакка алууга ордер берди. Сот Израилдин жетекчилигин Палестина аймактарында согуш кылмыштарын жасаган, анын ичинде ачарчылыкты курал катары колдонгон деп айыптады.