Ноокатта пара алууга шектүү бир нече кызматкер кармалды

Ош облусунун Ноокат районунун Көк-Жар айылдык милиция бөлүмүнүн бир катар кызматкерлери пара алууга шектелип жатат. Маалыматты Ички иштер министрлиги бүгүн, 25-ноябрда билдирди.

Анда айтылгандай, 20-ноябрда Ноокат РИИБинин Көк-Жар айылдык милиция бөлүмүнүн башчысы милициянын майору А уулу Т. кызматтык кабинетинде кол алдында иштегендерден акча алып жатканы боюнча тартылган видео жарыяланган.

Бул факты боюнча алдын ала текшерүүнү ИИМдин Ички иликтөө кызматы жүргүзүп, Кылмыш-жаза кодексинин 342-беренесинде (Адамдардын тобу тарабынан пара алуу) боюнча кылмыш иши козголгон.

Тергөөнүн жүрүшүндө 21-22-ноябрь күндөрү Ноокат РИИБинин беш участкалык ыйгарым укуктуу өкүлдөрү М. у Ш., Н.З., М.А., М. у Б., Х. у Т., ошондой эле Ноокат РИИБинин Көк-Жар айылдык милиция бөлүмүнүн нөөмөтчүсүнүн жардамчысы М.Н кармалды.

Алардын баарына тең пара алууга шериктеш болгон деген айып тагылып, Бишкек ШИИББинин убактылуу кармоочу жайына киргизилген. Соттун чечимине ылайык, шектүүлөр камалды.

Тергөө иштери уланууда.