"Даттануулар өтө көп". Депутат Бекешев тыгын көйгөйү чечилбей жатканын айтты

Жогорку Кеңештин депутаты Дастан Бекешев Бишкектеги жол тыгын көйгөйү чечилди деген маалымат чындыкка дал келбестигин айтты. Ал бул тууралуу бүгүн, 28-ноябрдагы парламенттин жыйынында өкмөттүн Жогорку Кеңештеги өкүлү Алмазбек Абытовдун жасаган баяндамасынан кийин билдирди. Абытов окуу жайлардагы окуу графигинин өзгөрүшү жол тыгынын азайтууда жакшы натыйжа бергенин белгилеген.

"Келиңиз, кагазга таянбай, чыныгы жашоону көрөлүчү. Кечинде, азыр кыш да келди, капкараңгыда кантип студенттер үйгө барышат? Көпчүлүгү шаардан алыс, Чүй облусунун аймагына барышат. Анысы аз келгенсип, автобекетти көчүрдүңөр. Же жаңы автобекет жок. Студенттер 2-3 автобусту которуп жүрүп, тыгында үйлөрүнө барышат. Өтө көп киши кыйналып жатат. Мүмкүн, статистика жакшы нерсени көрсөтүп жаткандыр, бирок чыныгы жашоодо такыр башка. Даттануулар өтө көп", - деди Бекешев.