Евробиримдик Грузиядагы шайлоону тааныган жок

Европарламент Грузияда 26-октябрда өткөн парламенттик шайлоонун жыйынтыгын тааныбаган резолюцияны жактырды. Бул тууралуу чет элдик басылмалар жазышты.

Документте добуш берүү эл аралык стандарттарга жана өлкөнүн ЕККУнун катышуучусу катары милдеттенмелерине туура келбегени белгиленген. Европарламент добуштарды бурмалоо боюнча айыптоолор боюнча көз карандысыз жана ачык иликтөө жүргүзүү идеясын колдоду. Шайлоо учурунда катталган мыйзам бузуулар Евробиримдикке талапкер мамлекеттен күткөн стандарттарга туура келбейт деп аталды.

Резолюция ошондой эле Евробиримдикти грузин парламентинин жетекчилигине жана демократияга каршы аракеттер үчүн жооптуу деп эсептелген бийликтеги "Грузин кыялы" партиясына каршы санкцияларды киргизүү маселесин карап чыгууга чакырат. Документте Еврокомиссия менен Евробиримдиктин Кеңешине Грузиянын жарандары үчүн визасыз режимди өлкө демократиялык башкаруу стандарттарына туура келбесе, кайра карап чыгуу сунушталат.

Ал арада грузин парламенти Ираклий Кобахидзе жетектеген жаңы өкмөттү бекитти. Өз сөзүндө жаңы премьер-министр Евробиримдик жана АКШ менен мамилени жакшыртууну убада кылып, ошол эле учурда Орусияга карата “прагматикалык саясатты” улантат деп билдирди.

Төрт партиянын өкүлдөрү болгон оппозиция шайлоонун жыйынтыгын таануудан баш тартып, парламент жыйындарына бойкот жарыялоодо.