Путин Орусия Киевге жаңы “Орешник” ракеталары менен сокку урарын айтты

Владимир Путин ЖККУнун Астанадагы саммитинде

Орусиянын президенти Владимир Путин Астанадагы ЖККУнун саммитинде Москва Киевдеги “чечим кабыл алуу борборлоруна” жаңы “Орешник” баллистикалык ракеталарын колдонуу менен сокку урууга даяр экенин билдиргенин чет элдик басылмалар жазышты.

Анын айтымында, Башкы штаб Украинанын куралдуу күчтөрүнүн Орусиянын аймактарына жасаган чабуулдарына жооп иретинде мындай чабуулдар үчүн буталарды аныктоодо.

Путин жаңы ракетанын өтө корголгон жана терең жайгашкан объектилерге сокку урууга жөндөмдүү экенин баса белгиледи. Ал кошумчалагандай, массалык түрдө колдонулганда "Орешник" өзөктүк куралга окшош зыян алып келиши мүмкүн, бирок ракета массалык кыргын салуучу курал эмес.

Президент ошондой эле бул ракеталарды массалык түрдө чыгаруу башталганын билдирди. Путин Орусия НАТО өлкөлөрүнө караганда 10 эсе көп ракета чыгарат деп ырастады. Бирок анын сөздөрү өндүрүш жаңы гана башталганы тууралуу мурунку билдирүүлөргө карама-каршы келет.