Борбор калаадагы базарлар иретке келтирилүүдө 

Бишкек шаарындагы "Орто-Сай" жана "Аламүдүн" базарлары иретке келтирүлүүдө. Бул тууралуу мэрия билдирди.

Маалыматка ылайык, мэрдин орун басарлары Азамат Кадыров менен Рамиз Алиев, шаардык кызматтардын кызматкерлери, Бишкек шаардык ички иштер башкы башкармалыгы, ӨКМдин кызматкерлери жогорудагы базарларды текшерүүгө алышкан.

Анда "Аламүдүн" жана "Орто-Сай" базарларында өрт коопсуздугунун сакталышы текшерилип, өрт өчүрүүчү техникалардын өтүүсүнө уруксатсыз иштеп жаткан объектилер, туура эмес токтотулган унаалар тоскоолдук жараткан.

"Аламүдүн" базарынын аймагына иретсиз токтоочу жайларга жана объектилерди уруксатсыз орнотууга көңүл бурулду. Автоунаалардын башаламан токтотулушу адамдардын өтүүсүнө тоскоолдук жаратып, жол эрежелерине каршы келет жана шаардын эстетикалык көрүнүшүн бузууда. ЖККБ башаламан токтогон айдоочуларга айып пул салат.

Базардын ээсине муниципалитет тарабынан ижарага алынган аймакты иретке келтирүү тапшырмасы берилди. Мыйзам бузуу аныкталган учурда Бишкек шаарынын мэриясы базардын аймагында тартипти орнотуу боюнча тиешелүү чараларды көрөт", - деп билдирди мэрия.

Ошону менен катар тамак-аш даярдоодогу санитардык нормалар, 300 орундуу көп кабаттуу унаа токтотуучу жайды түзүү планы талкууланган.