БУУ Газа тилкесине гуманитардык жардам берүүнү токтотту

БУУнун палестиналык качкындарга жардам көрсөтүү агенттиги Газа тилкесине гуманитардык жардам жеткирүүнү токтотуу чечимин чыгарды. Бул тууралуу расмий билдирүүнү агенттиктин башкы комиссары Филиппо Лазарини X социалдык тармактагы баракчасына жазды.

"Биз Газага гуманитардык жардамдын негизги өтүүчү пункту болгон "Керем Шалом" аркылуу жардам жеткирүүнү токтотуп жатабыз", - деп жазды ал.

Лазарини 16-ноябрда куралдуу топтор гуманитардык жүк ташуучу унаалардын чоң кербенин басып алганын белгиледи. Ушундай эле окуя 30-ноябрда да катталган. Анда дагы куралчан адамдар БУУнун азык-түлүк жүктөлгөн унааларын басып алышкан.

"Бул оор чечим ачарчылык тездик менен күчөп турган маалда кабыл алынды. Гуманитардык жардамды жеткирүү эч качан кооптуу же сыноо болбошу керек", - деди ал.

Анын айтымында, Газада уланып жаткан курчоо, Израилдин тоскоолдуктары, жардам көлөмүн чектөө боюнча саясий чечимдер, жеткирүү жолдорундагы коопсуздук жана жергиликтүү полицияга кол салуулар менен гуманитардык иш-аракеттер мүмкүн болбой калган.