Орусиянын жаңы ракетасына "Орешник" деген аталышты ким ойлоп тапканы белгилүү болду

Орусиянын жаңы баллистикалык ракетасы үчүн "Орешник" аталышын атайын даярдалган адамдар ойлоп тапкан. Бул тууралуу орус өкмөтүнүн төрагасынын биринчи орун басары Денис Мантуров билдирди.

"Ракетага аталышты атайын дайындалган адамдар ойлоп табышкан", - деген Мантуров.

"Орешник" - бул Орусиянын орто аралыкка учуучу баллистикалык ракетасы. Анын аты 21-ноябрда Орусиянын президенти Владимир Путиндин кайрылуусунда эң биринчи айтылган. Анда орус президенти Днепрдеги аскердик-өнөр жай комплексине өзөктүк куралы жок гиперүндүү "Орешник" менен сокку урулганын жарыялаган.

"Орешник" ракетасы Европадагы каалаган бутага тийе алат. Ракетаны токтотуу же атып түшүрүү мүмкүн эмес. Себеби ракета секундасына 3 километр учат.