Депутат Бекешев ишкерлер ККМ чекти каттоодон өткөрө албай жатканын айтты 

Бүгүн, 4-декабрдагы Жогорку Кеңештин кезектеги жыйынында депутат Дастан Бекешев ККМ чекти мамлекет каттоодон өткөрүү керектигин билдирди.

Эл өкүлүнүн айтымында, ККМ чекти жеке менчик компания каттоодон өткөргөндүктөн ишкерлер каттай албай убара тартып жатат.

"Учурда каттоодон өткөрүү ишин жеке менчик компания аткарып жатат. Тилекке каршы, көйгөйлөр бар. Бизде ишкерлер жаңы ККМди алып, салыкты төлөйбүз деп жатышат, бирок аны каттоодон өткөрө алышпайт. ККМ өчүп, иштебей жатат. Же салык төлөй албайсың, же ошол ККМди каттоодон өткөрө албайсың. Эртең салык кызматы келет, "Эмне үчүн ККМди иштетпей жатасың?" деп, аны иштетейин десең каттоодон өтпөйт. Себеби менчик компания арыздарды карабайт экен. Мамлекет телефондорду, ККМди жана башкаларды өзү эле каттоодон өткөрсүнчү. Жеке менчик компаниялардын дареги кайда? "крышасы ким?" билбейбиз, аларды табуу дагы кыйын. Ишкерлер бул нерсеге нааразы болуп жатат. Кимди күнөөлөш керек бул жерде?" - деди депутат Бекешев.