Кыргыз-казак өкмөттөр аралык кеңешинин жыйынында бир катар документтерге кол коюлду

Министрлер кабинетинин төрагасы Акылбек Жапаров менен Кыргызстанга иш сапары менен келген Казакстандын премьер-министри Олжас Бектенов кыргыз-казак өкмөттөр аралык кеңешинин кеңейтилген курамдагы кезектеги 12-жыйынын өткөрүштү.

Өкмөттүн басма сөз кызматынан билдиргендей, анын жыйынтыгында төмөнкү документтерге кол коюлду.

- Кыргыз-казак өкмөттөр аралык кеңешинин 12-жыйынынын протоколу;

⁃ Эки өлкөнүн өкмөттөрүнүн ортосундагы Ысык-Көл облусунун аймагында жайгашкан курорттук-рекреациялык объектилерге Казакстандын менчик укуктарын жөнгө салуу жөнүндө 2006-жылдын 4-июлундагы макулдашууга өзгөртүүлөрдү жана толуктоолорду киргизүү тууралуу протокол;

- Кыргызстан менен Казакстандын өкмөттөрүнүн ортосундагы Ысык-Көл районундагы жер участокторун ижарага берүү жөнүндө 2009-жылдын 1-декабрдагы макулдашууга өзгөртүүлөрдү жана толуктоолорду киргизүү тууралуу протокол;

- Кыргызстандын Экономика жана коммерция министрлиги менен Казакстандын Туризм жана спорт министрлигинин ортосундагы өз ара түшүнүшүү жөнүндө меморандум;

- 2024-2025-жылдарга Кыргызстандын Суу ресурстары, айыл чарба жана кайра иштетүү өнөр жай министрлиги менен Казакстандын Айыл чарба министрлигинин ортосундагы айыл чарба продукциясын өз ара жеткирүүлөрдү көбөйтүү боюнча жол картасы.