Камчыбек Ташиев УКМКга кимдер кызматка алынбай турганын айтып берди (видео)

Улуттук коопсуздук мамлекеттик комитетине туугандары кылмыш жоопкерчилигине тартылган жарандар кызматка алынбайт. Бул тууралуу бүгүн, 5-декабрда атайын кызматтын башчысы Камчыбек Ташиев парламентте билдирди.

"УКМКнын өзүнүн ички мыйзамдарына ылайык, эгерде ата-энеси, жакын туугандары, жубайы, бала-чаксы, атүгүл кайнене-кайнатасы соттолгон болсо да жумушка албайбыз. Ал тургай сотто күнөөлүү деп табылып, айып пул салынган болсо дагы албайбыз", - деди Ташиев.

Белгилей кетсек, Жогорку Кеңеште коррупционерлерге жаза чараларын күчөтүү мыйзамы биринчи окууда каралууда. Анда "жубайы же жакын туугандары коррупциялык кылмыш жасоого күнөөлүү деп таанылган учурда аскердик кызматка, укук коргоо органдарына же сот аткаруучулардын бөлүмдөрүнө кабыл алынбайт" деген жобо сунушталууда.