Акыйкатчы Сузактагы бала бакчада болгон окуя боюнча үн катты

Айтымында, бөбөктөрдүн билим берүү мекемелеринде мындай ырайымсыз мамилеге дуушар болуп жатканы өтө кейиштүү.

“Балдарга зордук-зомбулук көрсөткөндөргө карата мыйзам чегинде бардык чаралар колдонулушу керек. Балдардын коопсуздугун камсыздоо жаатында кечиктирилгис чаралар көрүлүшү зарыл”, - деди Жаманбаева.

Акыйкатчы институту билдиргендей, мекеменин Жалал-Абаддагы өкүлчүлүгү №1 “Кенжетай” бакчасында сабалган балдардан кабар алып, ата-энелери менен жолугуп келди.

Ата-энелердин үчөө балдарынын укугун коргоо өтүнүчү менен Акыйкатчыга кайрылган. Ур-токмокко кабылган бөбөктөр 2, 3 жана 4 жашта. Ата-энелеринин айтымында, үчөөнүн тең денелеринин ар жерлери көгөрүп, тытылган.

“Менин балам бул бала бакчага 2022-жылдын күз айынан тарта барат. Акыркы учурларда баламдын ар жери көгөрүп, кулагынын арты тытылып келгенде тарбиячыларынан сурасам, балдар менен уруша кетишти деп койчу. Баламды тарбиячылары уруп жүргөнүн 29-ноябрь күнү билдик. Учурда балам башы, бели ооруп жатканын көрсөтүп, ыйлап, кусуп жатат”, - деген балдардын биринин апасы.

"Ата-энелердин биринин Акыйкатчыга жазган арызында, алардан 700 сомдон чогултулуп видео көзөмөл орнотулган. Бирок, алар сураганда мекеменин жетекчиси видео көзөмөл эч кандай жазуу жүргүзбөгөнүн айткан", - деп жазылат анда.

Белгилей кетсек, социалдык баракчаларда бала бакчанын тарбиячысы наристелерге кол көтөргөнү боюнча маалыматтар тараган. Окуя Сузак районундагы бала бакчалардын биринде болгондугу айтылган. Ал эми Жалал-Абад ОИИБи аталган факты каттоого алынганын, териштүү иштери жүрө турганын билдирсе, Билим берүү министрлиги окуяга тийиштиги бар тараптар катуу жаза аларын убадалаган. Окуядан кийин жерине психологдор барган болчу.