Экс-депутат Канат Исаев үй камагына чыкты

Жогорку Кеңештин мурдагы депутаты, саясатчы Канат Исаев үй камагына чыкты. Бул тууралуу маалыматты бүгүн, 9-декабрда шаардык соттун басма сөз кызматы ырастады.

Билдирүүдө кабарлангандай, Канат Исаевдин бөгөт чарасын өзгөртүп, үй камагына чыгаруу тууралуу Чүй облусу боюнча УКМКнын Тергөө башкармалыгынын тергөөчүсү кайрылган. Октябрь райондук соту арызды 6-декабрда карап, өтүнүчтү канааттандырган.

Эске салсак, Исаев 20-ноябрда УКМКнын Чүй облустук башкармалыгынын кызматкерлери тарабынан кармалган. 22-ноябрда анын баш коргоо чарасы Октябрь райондук сотунда каралып, ал УКМКнын СИЗОсуна камакка алынган. Мурдагы депутат Кылмыш-жаза кодексинин "Уюшкан кылмыштуу топторду каржылоо" беренеси менен айыпталууда.

3-декабрда Исаевдин камактагы мөөнөтү кийинки жылдын 27-январына чейин узартылганы кабарланган.