Баткенде табигый кырсыктарды алдын ала аныктоочу метеостанция ачылды

Бүгүн, 9-декабрда Кадамжай районунун Майдан айылында Баткен облусунда климаттык коркунучтардан жана мүмкүн болгон табигый кырсыктардан коргоо максатында Фергана өрөөнүндө эрте эскертүү системасынын метеостанциясы ачылды. Бул тууралуу Баткен облусндагы өкүлчүлүктөн билдиришти.

Маалым болгондой, Майдан айылында жайгашкан жаңы метеостанция табигый коркунучтарды убагында аныктоо, маалыматтарды чогултуу жана талдоо аркылуу алдын ала божомолдорду жакшыртууга, ошондой эле ыкчам чара көрүүгө шарт түзөт.

Иш-чарага борбордук жана жергиликтүү бийликтин өкүлдөрү, ӨКМ кызматкерлери, Европа Биримдигинин Кыргызстандагы делегациясы жана айыл тургундары катышты.

Белгилей кетсек, аталган долбоор Европа Биримдиги тарабынан каржыланган БУУӨПтүн "Борбордук Азияда климаттын өзгөрүшү жана туруктуулук" программасынын алкагында ишке ашырылды.