Бишкекте митинг өткөрүүгө салынган тыюу узартылды

Бишкектин борборунда митинг өткөрүүгө салынган тыюу 31-декабрга чейин узартылды. Бул тууралуу маалыматты бүгүн, 9-декабрда Бишкек шаарынын Биринчи май райондук сотунан ырастады.

Маалыматка ылайык, сот Бишкектин Биринчи май администрациясынын тынч чогулуштарды өткөрүүнү чектөө тууралуу арызын 27-сентябрда карап, канааттандырган.

Митингге чыгууга болбой турган жайлар:

• "Ала-Тоо" аянтында;
• Эркиндик кең көчөсү: Темир жолдон Чүй кең көчөсүнө чейин;
• Президенттик администрациянын жана Жогорку Кеңештин имаратынын жанында;
• Панфилов паркында;
• Таттыбүбү Турсунбаева атындагы скверде;
• Жогорку соттун алдында;
• Орусиянын Кыргызстандагы элчилигинин алдында;
• УКМК жана ИИМ имараттарынын жанында.

Райондук сот ар кандай акцияларды Горький паркында өткөрүүгө уруксат берилгенин кошумчалады.

Белгилей кетсек, Биринчи май райондук соту 2022-жылы март айында аталган аймактарда митинг өткөрүүгө тыюу салган. Андан бери чектөөнүн мөөнөтү узартылып келет.