Араванда 62 жаштагы айылдашын сабаган жаран үй камагына алынды

Араван районунда айылдашын сабоого шектелген жаран үй камагына алынды. Бул тууралуу Ош облустук ички иштер башкармалыгы билдирди.

Маалыматка ылайык, 16-ноябрда милицияга Төө-Моюн айыл аймагынын 62 жаштагы тургуну денесинен жараат алып, ооруканага кайрылгандыгы тууралуу маалымат түшкөн. Бул факты каттоого алынып, тергөөгө чейинки текшерүү иши башталган. Текшерүүдө 15-ноябрь күнү жабырлануучуну 21 жаштагы айылдашы муштум менен сол көзүнө урганы белгилүү болгон.

Дайындалган соттук-медициналык экспертиза жабырлануучу денесинен оор жаракат алгандыгын аныктаган. Топтолгон материалдын негизинде Кылмыш-жаза кодексинин 130-беренеси (Ден соолукка оор залал келтирүү) менен кылмыш иши козголгон.

Шектүү кармалып, райондук сот тарабынан үй камагына чыгарылган. Учурда тергөө иштери уланууда.