Өлкөдө кийинки жылы 50 бөйрөк алмаштыруу операциясын ишке ашыруу пландалууда

Быйыл Эне жана баланы коргоо улуттук борборунун трансплантология бөлүмүндө 20 бөйрөк алмаштыруу операциясы жасалды. Бул туурасында Саламаттык сактоо министрлиги билдирди.

Маалымдалгандай, жыл аягына чейин дагы 2 операция жасалат. Кеткен чыгымдар мамлекеттик бюджеттен каржыланууда.

“Мындай операциялар улуттук борбордун базасында кыргызстандык хирургдардын аракети менен 2018-жылдан бери ийгиликтүү жүргүзүлүп келет. Жалпы 62 операция жасалып, анын 20сы 2024-жылы жасалды. Дары-дармек жана медициналык багыттагы буюмдар менен камсыздоону «Кыргызфармация» мамлекеттик ишканасы ишке ашырат”, - деп айтылат маалыматта.

Белгилей кетсек, 2025-жылы мамлекеттик бюджеттен каржыланган мындай операциядан 50нү жасоо пландалууда.