Бишкек мэриясы жаңы жылдык мыкты жасалгалоого сынак жарыялады (жол-жобосу)

Бишкекте жаңы жылдык мыкты жасалгалоо боюнча конкурс уюштурулат. Бул тууралуу калаа мэриясы кабарлады.

Маалыматка ылайык, конкурска шаар тургундары, мекеме-уюмдар жана ишканалар катыша алышат.

"Иш-чара майрамдык маанайды түзүү, шаардын эстетикалык көрүнүшүн жогорулатуу жана шаар тургундарынын чыгармачылык демилгесин колдоого багытталат", - деп билдирди мэрия.

Конкур төмөнкү номинациялар боюнча өткөрүлөт:

1. Администрациялык райондордун аймактарын (сейил бактарды, гүл бакчаларды, коомдук мейкиндиктерди жана башка) жаңы жылдык эң жакшы жасалгалоо;

2. Министрликтердин жана ведомстволордун имараттарынын фасаддарын жана жанаша жайгашкан аймактарды жаңы жылдык эң жакшы жасалгалоо;

3. Ири соода комплекстеринин, борборлорунун жана базарлардын фасаддарын жана аларга жанаша жайгашкан аймактарды жаңы жылдык эң жакшы жасалгалоо;

4. Соода жана кызмат көрсөтүү объекттеринин, кеңселердин жана башка объекттердин фасаддарын жана аларга жанаша жайгашкан аймактарын жаңы жылдык эң жакшы жасалгалоо;

5. Көп кабаттуу турак үйлөрдүн короолорун жаңы жылдык эң жакшы жасалгалоо.

Ал эми катышууну каалагандар 15-декабрдан 31-декабрга чейин dgh@meria.kg электрондук почтасына сынакка катышуу үчүн арызын электрондук түрдө тапшырышы керек. Ошону менен катар кооздолгон объекттердин сүрөт, видеолорун жөнөтүү шарт.