Прокуратура Ала-Букадагы мамлекеттик кызматкерлерге кылмыш ишин козгоду

Жалал-Абад облусунун Ала-Бука райондук билим берүү бөлүмүнүн жооптуу кызмат адамдары мыйзамсыз акча каражаттарын чогултуп келишкендиги аныкталды. Бул тууралуу Башкы прокуратура кабарлады.

Прокуратуранын маалыматына ылайык, аталган кызматкерлер материалдык жана башка артыкчылыктарды мыйзамсыз алууну көздөп, ыйгарым укуктарын кызматтын кызыкчылыгына каршы колдонушуп, кысым көрсөтүү жолу менен №33 жалпы орто билим берүү мектебинин директорунан 127 миң 975 сом акча каражатын МБанк тиркемеси аркылуу котортуп алышкан.

"Мындан тышкары, ушундай эле мыйзамсыз аракеттер райондогу башка билим берүү мекемелеринин жетекчилерине карата да колдонулуп, акча каражаттары мыйзамсыз жыйналган.

Бул фактылар боюнча Ала-Бука районунун прокуратурасы тарабынан кылмыш-жаза кодексинин 337-беренеси (“Кызмат абалынан кыянаттык менен пайдалануу”) менен кылмыш иши козголуп, тергөөнү жүргүзүү үчүн иш Ала-Бука райондук ички иштер бөлүмүнө өткөрүлүп берилди", - деп жазылат билдирүүдө.