Милиция Бишкекте кармалган журналисттер боюнча билдирүү жасады

Бүгүн, 23-декабрда Бишкектеги №1 тергөө абагынын жанында кармалгандар коё берилди. Бул тууралуу Бишкек шаардык ички иштер башкармалыгынан кабарлады.

Милициянын билдирүүсүндө 4-август күнү Бишкек шаарынын Октябрь райондук соту митинг, нааразычылык акцияларын, пикеттерди жана жөө жүрүштөрдү өткөрүүнү чектөө боюнча чечим чыгарганын эске салды.

"Бирок 23-декабрь күнү сот чечимин бузуп, Юстиция министрлигине караштуу Жазаларды аткаруу кызматынын №21 түзөтүү мекемесинин жанында топ адамдардын катышуусунда нааразычылык акциясы уюштурулган.

Аталган факт Бишкек шаарынын Октябрь райондук ички иштер башкармалыгында катталып, тергөө иштери башталган.

Алдын ала текшерүүнүн алкагында акциянын катышуучулары, ошондой эле "Азаттык Медиа" маалымат агентствосунун журналисттери жеткирилип, түшүндүрүү иштери жүргүзүлдү жана бардык жеткирилген адамдар коё берилди", - деп билдиришти шаардык милициядан.

Эске салсак, бүгүн СИЗО-1дин алдына чогулган камактагылардын жакындарын тартып жаткан “Азаттыктын” кабарчысы Максат Кутманбеков менен оператору Нурлан Бейшебаевди милиция кызматкерлери кармап кетишкен.