Azerbaijan Airlines Бакудан Орусиянын жети шаарына каттамдарын токтотту

Азербайжандын "AZAL" авиакомпаниясы 28-декабрдан тарта Бакудан Орусиянын жети шаарына каттамдарын токтотконун жарыялады. Бул тууралуу АПА агенттиги авиакомпаниянын билдирүүсүнө таянуу менен билдирди.

"Мындай чечим Embraer 190 учагынын кыйрашына жана учуу коопсуздугуна мүмкүн болуучу тобокелдиктерге байланыштуу алдын ала иликтөөнүн жыйынтыгынын негизинде кабыл алынды", - деп айтылат маалыматта.

Кырсыктын себептери боюнча акыркы иликтөө иштери аяктаганга чейин Бакудан Минеральные Воды, Сочи, Волгоград, Уфа, Самара, Грозный жана Махачкалага каттамдар токтотулган.

Авиакомпания Москва, Санкт-Петербург, Екатеринбург, Астрахань, Казань жана Новосибирск шаарларына каттамдарын улантат.

"AZAL" 25-декабрда Бакудан Грозныйга жана Махачкалага, ошондой эле карама-каршы багытта каттамдарды токтоткондугун жарыялады.

Эскерте кетсек, 25-декабрда жергиликтүү убакыт боюнча саат 11:30да Бакудан Грозныйга учуп келе жаткан Азербайжан аба жолдорунун учагы Актау шаарынан үч чакырым алыстыкта ​​кулап түшкөн. Учактагы 38 жүргүнчү каза болуп, 29 жаран, анын ичинен үчөөсү жаш балдар бейтапканага түрдүү жаракаттар менен жеткирилгендиги айтылган.