Садыр Жапаров УКМК төрагасынын орун басарлыгына Курванбек Авазовду дайындады

Улуттук коопсуздук мамлекеттик комитетинин төрагасынын орун басары – УКМКнын Антитеррордук борборунун директору болуп Курванбек Авазов дайындалды. Бул тууралуу бүгүн, 28-декабрда президенттин басма сөз кызматынан билдирди.

Маалыматка ылайык, тиешелүү тескемеге өлкө башчы Садыр Жапаров кол койгон.

Бул кызматты 2020-жылдын ноябрь айынан бери аркалап келаткан Айбек Шаменов 24-декабрда ээлеген кызматынан бошотулуп, президенттин Баткен облусундагы ыйгарым укуктуу өкүлү болуп дайындалган.

Авазов Курванбек Рахманович 1970-жылы 6-октябрда туулган. 2020-жылы "Реформа" партиясынын тизмеси боюнча №25 сапта Жогорку Кеңештин депутаттыгына талапкерлигин койгон. Ошол кезде ал УКМКнын тергөө бөлүмүнүн башчысы кызматын аркалап турган.