Сокулуктагы миллиондогон сомдук дан тегирмени мамлекетке алынды (фото)

Чүй облусунун Сокулук айылындагы мыйзамсыз менчиктештирилген дан тегирмени мамлекеттин менчигине кайтарылды. Бул тууралуу УКМКнын басма сөз кызматы кабарлады.

УКМК тарабынан жүргүзүлгөн текшерүү иш-чаралардын жыйынтыгында Чүй облусунун Сокулук айылында жайгашкан сметалык баасы 331 миллион 391 миң сомдук дан тегирмени, 2,4 гектар жер аянты менен мамлекетке кайтарылган.

"Дан тегирмени – фермердик жана үй-бүлөлүк чарбалар, элеваторлор, айыл чарба ишканалары жана тамак-аш өнөр жайынын ишканалары үчүн дан өсүмдүктөрүн тазалоо, кургатуу, ташуу жана сактоого багытталган оруп-жыйноодон кийин иштетүү үчүн механикалаштырылган машиналардын, жабдуулардын жана курулмалардын комплекси бар аянтча болуп саналат", - деп билдиришти УКМКдан.

Белгилүү болгондой, "Колос" дыйкан чарбасынын төрагасы Ш.А. 2023-жылдын 22-ноябрында 13 дыйкан чарбанын кызыкчылыгына каршы 2,4 гектар болгон дан тегирменин өзүнүн наамына мыйзамсыз түрдө каттатып алганы аныкталган.