Депутат Сурабалдиева Байсалов эмне менен алек болуп жүргөнүн түшүнбөй жатканын айтты

Бүгүн, 15-январдагы Жогорку Кеңештин жыйынында депутат Эльвира Сурабалдиева ымыркайларын таштап кеткен учурлар көп катталып жатканына тынчыздануусун билдирип, буга Министрлер кабинетинин төрагасынын орун басары Эдил Байсалов көңүл буруш керектигин айтты.

Ал парламентте беби-бокс (таштанды балдарды калтырып кетчү кутулар) маселесин дайым көтөрүп жаткынын белгилеп, бирок ал ишке ашпай атканына нааразы болду.

"Мына 3-январда дагы Кызыл-Кыя шаарындагы мечиттердин биринен ак шейшепке оролгон ымыркай табылыптыр. Милиция тарабынан тиешелүү иштер жасалыптыр. Урматтуу вице-премьер, эми кайсы жумуш менен алек болгонуңузду мен кээ бирде түшүнбөй калам. Келгиле бул маселени чечеличи. Беби-боксторду төрөт үйлөрдүн алдында уюштурсак, ал жакка баласын таштаган энелерге кайра ойлонуп алып кетиш үчүн убакыт берилет экен дагы, белгилүү мөөнөттөн кийин догдурларга өтөт экен. Эми канчалаган наристелер таштандылардын арасынан табылып жатат", - деди Сурабалдиева.

Ошондой эле депутат айым өлкөдө зордук-зомбулук фактылар көбөйүп жатканын белгилеп, бул боюнча өкмөттүн социалдык тармагын тейлеген вице-премьер Байсаловдун позициясын укпай жатканын айтты.