Коңшу Казакстанда картошканын баасы 70 сомдон ашты

Казакстандын бир катар аймактарында картошканын баасы кескин көтөрүлүп кеткендиктен, өкмөт үчүнчү өлкөлөргө картошка экспортун алты айга чектөөнү чечти. Бул тууралуу казак өкмөтү маалымдады.

Казак өкмөтүнүн басма сөз кызматы билдиргендей, премьер-министрдин тапшырмасы менен Айыл чарба, соода жана интеграция министрликтери өлкөнүн картошка рыногунда түзүлгөн кырдаалга тынымсыз мониторинг жүргүзүүдө.

"Коңшу өлкөлөрдөн, өзгөчө Өзбекстандан суроо-талаптын көбөйүшүнө жана экспорттук баанын жогору болушуна байланыштуу быйыл картошканын экспорту 1,5 эсеге көбөйүп, 411 миң тоннадан 605 миң тоннага чейин өстү. Шашылыш суроо-талап ички рынокко таасирин тийгизди", - деп жазылат казак өкмөтү тараткан билдирүүдө.

Мындан улам Казакстанда 18-январдан тарта картошканы экспорттоого убактылуу чектөө киргизилген.

Казакстандын аймактарында картошканын килограммы 380-400 (68 сом) теңгеге чейин көтөрүлгөн. Эң жогорку баа Астанада. Борбор шаардын тургундар бир килограмм картошканы 455 теңгеге (77 сом) алышууда.