Путин Трампты президенттик кызматка киришип жатканы менен куттуктады

Орусиянын президенти Владимир Путин Коопсуздук кеңешинин жыйынында Дональд Трампты АКШнын президенттигине расмий киришип жатканы менен куттуктады. Ал өлкөлөр ортосундагы диалогду калыбына келтирүүгө даяр экенин билдирди.

"Биз АКШнын жаңы шайланган президенти менен анын командасынын мүчөлөрүнүн Орусия менен түз байланыштарды калыбына келтирүү каалоосу тууралуу билдирүүсүн көрүп жатабыз. Бул байланыштар биздин эмес, кетип жаткан администрациянын күнөөсү менен үзгүлтүккө учураган. Албетте, биз мындай мамилени кубаттайбыз жана Америка Кошмо Штаттарынын шайланган президентин кызматка киришүүсү менен куттуктайбыз", - деди орус лидери.

Украинадагы жаңжалды жөнгө салуу тууралуу сөз кылып жатып, Путин кризистин түпкү себептерин жок кылуу зарылдыгын белгиледи.

"Анын максаты кыска тыныгуу эмес, чыр-чатакты андан ары улантуу максатында күчтөрдү кайра топтоо жана кайра куралдандыруу үчүн кандайдыр бир тыныгуу эмес, бул аймактагы бардык адамдардын, бардык мамлекеттердин мыйзамдуу таламдарын урматтоого негизделген узак мөөнөттүү тынчтык болушу керек", - деп белгиледи орус президенти.

CNN телеканалынын маалыматына караганда, Трамп буга чейин жардамчыларына Путин менен жакынкы күндөрдө телефон сүйлөшүүсүн уюштурууну тапшырган. Телеканалдын булактары алдыдагы сүйлөшүүнүн максаттарынын бири Украинадагы аскерий аракеттерди токтотуу жолдорун талкуулоо экенин ырасташты. Кошумчалай кетсек, Американын жаңы президентинин командасы эки өлкөнүн лидерлеринин жеке жолугушуусун уюштуруунун үстүндө иштеп жатат.