Социалдык баракчалардан комментарий жазган жаран массалык башаламандыкка шектелип кармалды

Өлкөдө массалык башаламандык уюштурууну көздөгөнгө шектелип Огуз каймана аты бар 1988-жылы туулган Б.Э. аттуу жаран кармалды. Бул туурасында УКМКнын маалымат борбору билдирди.

Маалымдалгандай, ал Камчы Көлбаевдин уюшкан кылмыштуу тобунун мүчөсү катары ИИМде каттоодо турган. Ошондой эле 2013-жылы Кылмыш-жаза кодексинин 123-беренеси (Адам уурдоо), 2022-жылы Кылмыш-жаза кодексинин 283-беренеси (Баңги каражаттарын мыйзамсыз даярдоо) боюнча соттолгон.

Кошумчалангандай, шектүү социалдык тармактарда фейк аккаунттар аркылуу, өч алуу ниетинде массалык башаламандыкка чакырган постторду байма-бай жарыялаганы аныкталган.

Бул факты боюнча Кылмыш-жаза кодексинин 278-беренеси (Массалык башаламандык) менен кылмыш иши козголуп, ал Юстиция министрлигинин №21 мекемесине киргизилген.

Учурда тергөө иштери уланууда.