Ошто 3 жигит ээси намаз окуганы кеткенде сатыктагы телефондорун уурдаганга шектелип кармалды

Кара-Сууда уурулукка шектелип 18 жаштагы 3 жигит кармалды. Бул тууралуу бүгүн, 27-январда Ош облустук ички иштер башкармалыгы билдирди.

Маалыматка ылайык, 23-январда милицияга 31 жаштагы жаран арыз менен кайрылган. Ал Кара-Суу шаарындагы "Оомат" базарында соода кылып жатып, намаз окуганы чыгып кеткенде сатыкка коюлган 80 миң сомдук 1 даана iPhone 14 Pro Max, 1 даана 70 миң сомдук iPhone 14 Pro жана 60 миң сомдук iPhone 14 Pro үлгүсүндөгү телефондорун уурдатканын айткан. Натыйжада жабырлануучу 210 миң сом зыян тарткан.

Бул факты боюнча Кылмыш-жаза кодексинин 205-беренеси (Уурдоо) менен кылмыш иши козголуп, шектүү катары Чүй облусунун, Бишкек шаарынын жана Жалал-Абад облусунун 18 жаштагы тургундары кармалган. Алар убактылуу кармоочу жайга киргизилди.

Учурда шектүүлөрдүн мындан башка дагы кылмыштуу иштерге тиешеси бар-жогу аныкталууда.