Бишкекте 24 жаштагы жигиттин үйүнөн болжолдуу 1,5 миллион сомдук баңгизат табылды (видео)

Бишкекте 24 жаштагы жаран баңгизат сатканга шектелип кармалды. Бул туурасында Бишкек ШИИББинин басма сөз кызматы билдирди.

Маалымдалгандай, 25-январь күнү Биринчи май райондук милициясына кабар келип түшкөн.

Бул боюнча тергөө кызматы Кылмыш-жаза кодексинин 282-беренесине (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) ылайык кылмыш ишин козгогон.

Натыйжада 2001-жылы туулган А.А. аттуу шектүү кармалып, убактылуу кармоочу жайга киргизилген.

"Милиция кызматкерлери шектүүнүн дарегин тинтүү учурунда 188 даана синтетикалык заттарды табышкан. Алардын жалпы салмагы 367 граммды түзүп, шектүүнүн көрсөтмөсүндө ал заттар 1 миллион 500 миң сомго бааланган. Бардык синтетикалык заттар соттук-эксперттик кызматка жөнөтүлгөн. Мындан тышкары шектүү башка аталыштагы баңгизатты Телеграм каналы аркылуу алып, сатып жүргөнү аныкталган", - деп айтылат маалыматта.

Учурда тергөө иштери уланууда.